Շրջակա միջավայրի նախարարությունը Գերմանիայի միջազգային համագործակցության ընկերության (GIZ) հետ համատեղ, «Եվրոպան կլիմայի դիմակայունության համար» (EU4ClimateResilience) տարածաշրջանային ծրագրի շրջանակում, 2026 թվականի մայիսի 14-ին կազմակերպել է Չափողականության, հաշվետվայնության և հավաստագրման (ՉՀՀ/MRV) թվային համակարգում ջերմոցային գազերի արտանետումների էլեկտրոնային շտեմարանի գործարկմանը նվիրված աշխատաժողով։
Աշխատաժողովի ընթացքում պաշտոնապես մեկնարկել է ջերմոցային գազերի արտանետումների թվային էլեկտրոնային շտեմարանի աշխատանքը, որտեղ հավաքագրվելու և գրանցվելու են արտանետումների տվյալները՝ ըստ ոլորտների, աղբյուրների և ժամանակահատվածների։ Շտեմարանի ներդրումը նպատակ ունի ապահովել ջերմոցային գազերի գույքագրման և կադաստրի վարման գործընթացների առավել արդյունավետ, համակարգված և թվայնացված իրականացում։
Միջոցառմանը մասնակցել են պետական գերատեսչությունների, միջազգային կազմակերպությունների և զարգացման գործընկերների ներկայացուցիչներ։
Աշխատաժողովին նախորդել է մայիսի 11-12-ը կազմակերպված երկօրյա դասընթացը, որի ընթացքում շահագրգիռ գերատեսչությունների աշխատակիցները ծանոթացել են համակարգի տեխնիկական հնարավորություններին և գործնականում կիրառել տվյալների ներբեռնման գործընթացը։
Մայիսի 13-ին, ԵՄ էներգետիկ համայնքի քարտուղարության ներկայացուցիչների ներգրավմամբ, անցկացվել է նաև մեկօրյա համապարփակ աշխատաժողով՝ նվիրված ՉՀՀ համակարգի կայացման կարևորությանը։ Քննարկվել են փաստահեն կլիմայական քաղաքականության մշակման, Փարիզի համաձայնագրից և Հայաստանի կողմից ստանձնած միջազգային պարտավորություններից բխող պահանջների կատարման, ինչպես նաև կայացած ՉՀՀ համակարգի առկայության պայմաններում կլիմայական ֆինանսների հասանելիության ընդլայնման հնարավորությունները։
«EU4ClimateResilience» տարածաշրջանային ծրագիրը ֆինանսավորվում է Եվրոպական միության և Գերմանիայի շրջակա միջավայրի, կլիմայական գործողությունների, բնության պահպանության և միջուկային անվտանգության դաշնային նախարարության կողմից։