«Հայաստանում թափոնների կառավարման քաղաքականություն» (WPA) ծրագրի շրջանակում Հայաստանի Հանրապետության պատվիրակությունը, որի կազմում էին Շրջակա միջավայրի նախարարի տեղակալ Արա Մկրտչյանը, ՀՀ Ազգային ժողովի Տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողովի նախագահ Վահե Ղալումյանը, ՀՀ Ազգային ժողովի Տնտեսական հարցերի մշտական հանձնաժողովի նախագահի տեղակալ Բաբկեն Թունյանը, Շրջակա միջավայրի նախարարության և միջազգային կազմակերպությունների ներկայացուցիչներ, աշխատանքային այցով գտնվել են Շվեդիայի Թագավորությունում։
Այցի նպատակն էր Հայաստանի Հանրապետության պետական կառույցների և ոլորտային կազմակերպությունների ներկայացուցիչներին հնարավորություն ընձեռել տեղում ուսումնասիրելու Շվեդիայում ներդրված արտադրողի ընդլայնված պատասխանատվության (ԱԸՊ) համակարգերը, թափոնների կառավարման ժամանակակից և արդյունավետ մոդելները, ինչպես նաև շրջանաձև տնտեսության սկզբունքների գործնական կիրառման փորձը։
Այցի շրջանակում Արա Մկրտչյանը հանդիպումներ է ունեցել Շվեդիայի Արտաքին գործերի նախարարության ղեկավար կազմի և Շվեդիայի միջազգային զարգացման համագործակցության գործակալության (Sida) ներկայացուցիչների հետ։
Հանդիպումների ընթացքում քննարկվել են արտադրողի ընդլայնված պատասխանատվության համակարգի ներդրման և զարգացմանն առնչվող առանցքային հարցերը՝ մասնավորապես շահագործումից դուրս եկած տրանսպորտային միջոցների, անվադողերի, էլեկտրական և էլեկտրոնային սարքավորումների, մարտկոցների, ինչպես նաև փաթեթավորման թափոնների կառավարման ոլորտներում կիրառվող իրավական, ինստիտուցիոնալ և ֆինանսական մեխանիզմները։ Անդրադարձ է կատարվել նաև ոլորտի պետական կարգավորման, վերահսկողության, պատասխանատվության բաշխման և մասնավոր հատվածի ներգրավման արդյունավետ միջազգային փորձին։
Հանդիպումների արդյունքում Արա Մկրտչյանը գործընկերների հետ ձեռք է բերել պայմանավորվածություններ՝ շարունակելու մասնագիտական համագործակցությունը, ապահովելու շվեդական առաջավոր փորձի և մեթոդաբանությունների փոխանցումը, ինչպես նաև աջակցելու Հայաստանում արտադրողի ընդլայնված պատասխանատվության համակարգի ներդրման և ոլորտային բարեփոխումների իրականացման գործընթացին՝ հաշվի առնելով ազգային օրենսդրության և տեղական առանձնահատկությունների պահանջները։
Պատվիրակությունն այցելել է նաև Շվեդիայի Սյոդերթելյե քաղաքում գործող Tveta թափոնների կառավարման համալիր, որտեղ ծանոթացել է համայնքային թափոնների կառավարման ամբողջական համակարգին՝ թափոնների առաջացումից, հավաքումից և տեսակավորումից մինչև վերամշակում, էներգետիկ օգտագործում և ծառայությունների ֆինանսավորման մեխանիզմներ։ Ներկայացվել են տարբեր թափոնահոսքերի՝ կենցաղային թափոնների, փաթեթավորման, էլեկտրական և էլեկտրոնային սարքավորումների, մարտկոցների, անվադողերի և տեքստիլի կառավարման առանձնահատկությունները։
Քննարկումների առանցքում են եղել համայնքային թափոնների կառավարման համակարգերի և արտադրողի ընդլայնված պատասխանատվության մեխանիզմների արդյունավետ փոխգործակցությունը, պետական և մասնավոր հատվածների դերերի հստակ տարանջատումը, ինչպես նաև կառավարման կայուն և ֆինանսապես կենսունակ մոդելների ձևավորման նախադրյալները։ 
Քառօրյա աշխատանքային ծրագրի ընթացքում պատվիրակությունը հանդիպումներ է ունեցել նաև Շվեդիայի բնապահպանական գործակալության, արտադրողի ընդլայնված պատասխանատվության կազմակերպությունների, ոլորտային ասոցիացիաների և թափոնների կառավարման այլ մասնագիտացված կառույցների ներկայացուցիչների հետ։