Շրջակա միջավայրի նախարարի մասնակցությամբ հանդիսավոր կերպով նշվեց  Օդերևութաբանության համաշխարհային օրը, ինչպես նաև Հայաստանի Հանրապետությունում անտառագետի, ջրաբանի մասնագիտական օրերը
Միջոցառման շրջանակում նախարարը շնորհավորել է ոլորտի բոլոր ներկայացուցիչներին՝ ընդգծելով, որ նրանց գործունեությունն ունի առանցքային նշանակություն ոչ միայն բնապահպանական համակարգի, այլև երկրի անվտանգության, տնտեսության կայունության և հասարակության բարեկեցության ապահովման գործում։
Իր խոսքում նախարարը անդրադարձել է կլիմայի փոփոխության գլոբալ մարտահրավերներին՝ նշելով, որ այսօր առավել քան երբևէ կարևորվում են գիտականորեն հիմնավորված դիտարկումները, ճշգրիտ կանխատեսումները և վաղ նախազգուշացման արդյունավետ համակարգերը։ Նրա խոսքով՝ դրանք հնարավորություն են տալիս ժամանակին արձագանքել եղանակային վտանգավոր երևույթներին, նվազեցնել ռիսկերը և պաշտպանել համայնքներն ու բնական ռեսուրսները։
Հանդիսավոր նիստի ընթացքում ներկայացվել են նաև «Հայհիդրոմետ» ՊՈԱԿ-ի գործունեության հիմնական արդյունքները, ձեռքբերումները և զարգացման ուղղությունները։ Կարևոր բաղադրիչ է կազմել նաև ոլորտի մի շարք աշխատակիցների պարգևատրման արարողությունը՝ գնահատելով նրանց մասնագիտական նվիրումը և ներդրումը համակարգի զարգացման գործում։
Միջոցառման ընթացքում առանձնահատուկ ուշադրություն է հատկացվել նաև կրթական և հանրային իրազեկման բաղադրիչին. ամփոփվել են «Դիտարկիր այսօր՝ պաշտպանիր վաղվա օրը» խորագրով ստեղծագործական մրցույթի արդյունքները, և պարգևատրվել են լավագույն աշխատանքների հեղինակ երեխաները, ինչը ևս մեկ անգամ ընդգծում է ապագա սերնդի ներգրավվածության և բնապահպանական կրթության կարևորությունը։
Նախարարը վստահություն է հայտնել, որ ոլորտի մասնագետների հետևողական և համակարգված աշխատանքը, ինչպես նաև միջազգային համագործակցության զարգացումը շարունակելու են նպաստել երկրի դիմակայունության բարձրացմանը և կլիմայական մարտահրավերների արդյունավետ հաղթահարմանը։