Շրջակա միջավայրի նախարարությունն ուսումնական ծրագրով նախատեսված նախագծային աշխատանքի շրջանակում հյուրընկալել էր Երևանի թիվ 195 ավագ դպրոցի աշակերտներին։

Դպրոցը մասնակցում է ԿԳՄՍ նախարարության կողմից երաշխավորված «Սմարթ-էկրաններ աշխարհացույցի դպրոցներին» խորագիրը կրող մրցույթին, որի շրջանակում իրականացվում է «Քարտեզագրելով Հայաստանի բնության ապագան, դեղաբույսերի աշխարհը և բնական դեղատան գաղտնիքները» թեմայով նախագծային աշխատանք։

Ծրագիրն իրականացնում են դպրոցի աշակերտները՝ ուսուցիչների աջակցությամբ։ Նախագծի նպատակն է աշակերտների շրջանում բարձրացնել բնապահպանական գիտակցությունը, խթանել հետազոտական մտածողությունը և ձևավորել ակտիվ մասնակցություն շրջակա միջավայրի պահպանության հարցերում։

Հանդիպում-քննարկմանը մասնակցել են նախարարության համապատասխան ստորաբաժանումների մասնագետները, որոնք աշակերտներին ներկայացրել են դեղաբույսերի պահպանման, դրանց ճիշտ հավաքման եղանակների, բուժիչ հատկությունների և հանրային իրազեկվածության բարձրացմանն ուղղված աշխատանքները։ Նախարարության մասնագետները նաև ներկայացրել են, թե ինչ քայլեր են իրականացվում և ինչ ծրագրեր են նախատեսվում վերացման եզրին գտնվող դեղաբույսերի պահպանության և ՀՀ Կարմիր գրքում ընդգրկվելու վտանգից դրանք պաշտպանելու ուղղությամբ։