Վերաբնակեցման նպատակը ՀՀ տարածքում հանդիպող կենդանատեսակի վերադարձն է իր կենսամիջավայր՝ պոպուլյացիայի վերականգնման կամ համալրման նպատակով:

ՀՀ-ում ազատ պայմաններում վայրի կենդանիներ վերաբնակեցնելու համար անհրաժեշտ է Շրջակա միջավայրի նախարարությունից ստանալ համապատասխան թույլտվություն։

Թույլտվություն ստանալու հայտը նախարարություն հնարավոր է ներկայացնել էլեկտրոնային փոստով կամ ֆիզիկապես։

Ազատ պայմաններում վայրի կենդանիներ վերաբնակեցնելու թույլտվություն ստանալու հայտ ներկայացնելու համար անհրաժեշտ է պահանջվող փաստաթղթերն ուղարկել նշված էլեկտրոնային հասցեին՝ minenv@env.am:

Պահանջվող փաստաթղթերը

Նշված էլ․ փոստի հասցեին անհրաժեշտ է ուղարկել հետևյալ փաստաթղթերը՝

• դիմում-հայտ,

• պետական գրանցման վկայականի կամ անձը հաստատող փաստաթղթի պատճենը (անհատ ձեռնարկատեր հանդիսացող անձի դեպքում նաև ԱՁ-ի պետական գրանցման վկայականի պատճենը),

• բնապահպանական նպատակով կենդանական աշխարհի օբյեկտների օգտագործման մասին կնքած պայմանագրի պատճենը,

• անազատ և կիսաազատ պայմաններում վայրի կենդանիներ պահելու թույլտվության պատճենը:

• յուրաքանչյուր կենդանական տեսակի համար կազմված վերաբնակեցման ծրագիր, որը պետք է ներառի՝

• վերաբնակեցվող կենդանական տեսակի (հայերեն՝ առկայության դեպքում և լատիներեն անվանումները), առանձնյակների քանակի, սեռի, հնարավորության դեպքում՝ տարիքի վերաբերյալ տեղեկատվություն,

• գիտահետազոտական հիմնարկների, բարձրագույն մասնագիտական ուսումնական հաստատությունների կամ համապատասխան մասնագիտական որակավորում ունեցող իրավաբանական կամ ֆիզիկական անձանց կողմից վերաբնակեցման ենթակա տարածքի ներկա վիճակի և ներուժի գնահատումը, ինչպես նաև առկայության դեպքում վերջին՝ մինչև 10 տարիների ընթացքում կատարված կենդանական աշխարհի մոնիթորինգի տվյալները,

• վերաբնակեցման արդյունքում հնարավոր ռիսկերի գնահատումը և վերլուծությունը՝ յուրաքանչյուր կենդանական տեսակի առանձնահատկություններով պայմանավորված՝ ներառյալ սոցիալական, տնտեսական, բնապահպանական և առողջապահական հարցերը՝ հաշվի առնելով կենդանական տեսակների պահպանության, կենսաանվտանգության, կենդանուց կենդանուն, ինչպես նաև կենդանուց մարդուն բազմաթիվ հիվանդությունների փոխանցման ռիսկերը և խնդիրները.

• ծրագրի ֆինանսական գնահատականը, ֆինանսավորման աղբյուրը և ծախսերի բացվածքը,

• վերաբնակեցման տարածքում բնություն վերադարձված առանձնյակների հարմարվողականության, վարքագծի, թվաքանակի փոփոխությունների, ինչպես նաև մարդածին և բնական ազդեցությունների գնահատման նպատակով մոնիթորինգի պլանը՝ ներառյալ դրա ֆինանսավորման չափի և ֆինանսավորման աղբյուրի, ինչպես նաև իրականացնող մասնագիտացված կառույցի մասին տեղեկատվությունը: 

• բաց թողնման վայրերի ընտրության գործընթացում մարզպետի աշխատակազմի և տեղական ինքնակառավարման մարմինների քննարկման դրական արդյունքները,

• վերաբնակեցման ծրագրի վերաբերյալ գիտահետազոտական հիմնարկների կամ բարձրագույն մասնագիտական ուսումնական հաստատությունների կողմից տրամադրված դրական եզրակացությունը։

Ծրագիրը ներկայացվում է անազատ և կիսաազատ պայմաններում պահվող վայրի կենդանիների, այդ թվում՝ ՀՀ կենդանիների Կարմիր գրքում գրանցված կենդանիներ պահելու թույլտվություն ունեցող ֆիզիկական կամ իրավաբանական անձանց կողմից։

Ծառայության մատուցումը մերժելու հիմքերը

Հայտը մերժվում է, եթե՝

• ներկայացված փաստաթղերը թերի են, բացակայում են, կամ դրանցում ներկայացված տեղեկությունները չեն համապատասխանում իրականությանը և օրենսդրության պահանջներին,

• հայտում կամ փաստաթղթերում բացահայտված թերությունները չեն շտկվում ծանուցվելուց հետո 10 աշխատանքային օրվա ընթացքում ։

Տրամադրման ժամկետը և կարգը

Թույլտվությունը տրվում է դիմումը ներկայացնելուց հետո 15 աշխատանքային օրվա ընթացքում։